زمن باكي.. هاشم الفكي 

زمن باكي..

هاشم الفكي

زمن مُبكي..
زمن خلا
العيون تشكي..
دموع جاريه
دموع تحكي..
حرب كشفت
معادن الناس..
منو العزاك..
منو الواساك..
وخلى خطاهو
ليك تجري..
زمن حدد
معالم الناس..
وضّح
موضع الإحساس.. تعابير الوجوه تعكس..
منو البهديك
على سكة
شعور مياس..
منو الناداك..
وقال ليك
تواريخك دوام تحكي..
زمن جرف الفؤاد روّح..
كسر الريدة
في الوجدان..
نزاع بين
السؤال..
والشوق..
غير موضع الاشجان..
زمن الاهه
مابتطلع..
اذا طلعت
بدون عنوان..
تمزق
في العواطف
يود..
عتاب في عتاب..
ولوم في لوم..
تعود
الجلسه حنيه..
زمن
والله يتمدد..
زمن
والله ما جدد..
نفوس الريدة
راحت جد..
قليل
الطيبه ورديه..
زمن والله
كلو هموم..
زمن
فيهو الشجن
ما بدوم..
زمن
ترك العواطف
كوم..
لا بترجع..
ولا بتسمع..
ولا بتدوم..
فقدنا
النسمه والأشواق..
فقدنا معاها اي عناق..
فقدنا معاها
اي غيوم..
مطر نازل..
منو البيوصل..
منو الواصل..
زمن
كسر مقاديفنا..
صبحنا
بنسأل السنوات..
شنو الحاصل..
زمن بيشكي..
وزمن شاكي..
أمور
بتحير القاضي..
فصول نقراها
في الأوراق..
زمان ماضينا
كان جذاب..
صبح حاضرنا
فيهو عذاب..
زمن
ضيعنا في الوادي..
محل مانمشي
بي غادي..
نعاين والمسافة سراب..
زمن مدهش..
زمن كذاب..
زمن مخجل..
قرينا كتاب..
زمن موجع..
فقدنا صحاب
لابتعرف منو الصادق..
ولا بتعرف منو الكذاب..
جلسنا وقلنا ديل أحباب..
خداع في خداع.. نفاق في نفاق..
وفي الآخر
معاني الدنيا
فيها خطاب..
حساب في حساب..
شمس تشرق..
شمس بتغيب..
دواخل الناس
هواها عجيب..
مرات تلقى
زول
بيهواك..
ومرات
بالنفاق يطويك..

زمن شاكي..
زمن باكي..
زمن مبكي..
زمن يبكيك..
ختام نضمي
بين حرفين
هناك والله
ناس صادقين..
لولاهم
نحس الوجعة
بين وجعين..
نقدس فيهم التعريف.. والتشريف..
عظيم والله
هم سمحين..
وماناسين..

زمن
والله جد مبكي..

شكرا للمستمع ومحرر الصفحة